Last Day :(

اليوم كان اخر يوم في تدريبي في فصل الصيف، فحبيت اكتب اليوم عشان اشكر الدكاترة على كل الي سووا لنا في فترة التدريب، و معاملتهم الاكثر من رائعة و صراحة فادونا بكثير من الأشياء الي كنت ما اعرفها من قبل عن طب الأسنان .

*

*

*

شكرا

.
.
.
د. سونيا

ممارس عام و جراحه

.

.

.

د. طارق بورزق

اختصاصي تركيبات و جسور و تجميل

.

.

.

د. هادي الصفار

اختصاصي لثه و زراعة

.

.

.

و كافه أطباء مركز البيان لطب الاسنان فرع مدينة الكويت :)

.

.

ساعات أشياء تمر لفترة صغيرة في حياتك بس تأثر فيك حيل او تغير فيك أشياء وايد....... أخر شهرين مروا بسرعة بس الاستفادة الي خذيته سواء في طب الاسنان او تعامل مع الناس او المرضى ما تتعوض.

كل واحد منكم اذا حب يشاركني في قصة او موقف اثر في حياته وايد و غير نظرته للامور............ ناطرة ردودكم :)

Sadness

كل واحد فينا يمر بلحظة تصك في الدنيا و ماله خلق روحه، بس شلون تنفس عن هذا الحزن او الغضب الي فيك، هذه السالفة تختلف من شخص لي شخص، في ناس يطلعون حرتهم باول واحد يشوفونه حتى لو ماله شغل و في ناس يدشون غرفتهم و يبدون يبجون...الخ.

بالنسبه لي لما أتضايق أكتب و ساعات حده الكتابه تفيد

*

*

الشقــــــــــــــــــــــــــــــــــــــا

ماأدري ليش انكتب علي الشقا.....و أنا ما دنيت صوبه

من يوم لي يوم يلاحقني....حـــــــاسبني محبــــــوبه

أبي أفرح بدنيتي لحظة....يقاطعني بشراسة اسلوبه

يمكن كلمة ما يثمنها....و يمكن من طبعة و ثوبه

خـلاص لا تغلط علي....ترى حــوبتي حــوبه

*

*
*

هــــــــــانت العشـــــــــــره

ليش هانت عليك العشرة....و تبريت من اعز ناسك

من يغلط يتحمل غلطه....انت يبت عوار راسك

ثمن كل كلام قلته....و لا تقوي علي باسك

ماراح اراضيك و لا ارضى....ترى محد جاسك

لا تهددني بنظرة....ماكو علي شي ماسك

واذا اذيتي في بالك فكره....بالعن ساس ساسك

*

*

*

كل واحد فينه يعصب و يزعل بس الاهم ان يستفيد من هذا الشي..... كل واحد يسأل هالكلام له علاقة بطب الاسنان؟؟؟

ايه اكيد طبيب الاسنان انسان و هذا الشي الكثير ما يحطونه في بالهم، و خصوصا اذا راحوا الحكومة جنه الطبيب يشتغل عندهم و عمدا قاعد يأخرهم!!!!

تدرون شنو أكثر شي يأخر الدكتور كل ساع ياي مريض و داق الباب و وقف الشغل، حطوا روحكم مكانه كل ساعه ياي احد يقاطعكم و يزعجكم و يشوشر عليكم، شنو راح تسووون؟!!! اكييد راح يوصل المؤشر على الاحمر و احنا نبيه خضرة

U R a Dentist?!!

اليوم كل واحد يتخيل ان طبيب اسنان و عنده هالمشكلة تواجهه؟!! يا ترى شنو راح يسوي؟!!

عندك ضرس دايما يعورك من بارد او الحار و حتى مع المضغ ( لما تاكل يعني) و مامنه فايدة تعالجه لان الضرس في الفك المقابل مو موجود فانت اصلا مو قاعد تستخدمه:

1- تخلع الضرس. أريح و ارخص

2- تعالج الضرس. مع انه ما راح يفيدك في شي

3-تعالج الضرس و تزرع ضرس في الجهه المقابلة. عشان تستفيد من الاثنين مع انه راح يكلفك

ألحين لنفترض هذا الضرس هو صديقك:

1- تهده. الباب الي اييه منه الريح سده و استريح

2-تحاول تصلح من أطباعه مع انه بو طبيع ما يوز من طبعه

3-اتحاول تتوصلون انتو الاثنين لحل وسط تصلح منه و تزرع منك بس راح يكلفك وقت ومع الناس النتيجه مو مضمونه مو مثل الاسنان

ملاحظة: لا تنسون ان صديقك هذا كان ياذيك و يناشبك على كل شي( البارد و الحار) و معور راسك

حسبتك لي صديق .....و أكثر من أخو

وخاب فيك ظني....و ظلمتني أكثر من عدو

الحقيقة ان الثقة....ماتعطي واحد مو كفو

مثلك ما يمشي....معاه السماح والعفو

اهداء مني لكم

DO U ?!!!

How often do u floss or go to the dentist for scaling??

متى اخر مرة نظفت اسنانك في الخيط او ذهبت لتنظيف لثه عند طبيب الأسنان او الفنية؟؟

معلومات مهمه الكثير غافل عنها:

1- تنظيف الاسنان بالفرشه و المعجون يتم على الاقل مرتين يوما مرة الصبح و مرة بليل ( وأقل مده 4 دقائق)

2- تنظيف بالخيط يجب ان يتم يوميا على الاقل مرة واحده ( و اذا لم يستخدم نلاحظ نزيف طفيف للثه عند تفريش الاسنان)

3- تنظيف اللثه دوريا كل 6 أشهر عند طبيب الأسنان او عند الفنية

** ملاحظة: اللثه من تسبب رائحة كريهه للنفس عند الاتهابها و عدم استخدام الخيط او التنظيف الدوري

لاي اسئله عند كيفية التفريش او استخدام الخيط او تنظيف اللثه لا تتردد في السؤال؟؟

لا تنسون تجاوبوني : متى اخر مرة نظفت اسنانك بالخيط او ذهبت للفنية او طبيب الاسنان لتنظيف اللثه

Dental Cartoons......LOOOL

أنا و السوسة و الابرة

تبدأ قصتي مع السوسة قبل شهر، لما كنت قاعدة أسوي تنظيف لأسناني و قالولي عندي سوسة صغيرة، و شي طبيعي لازم ما أخلي السوسة تكبر و توصل العصب، فقررت قبل يومين ان اشيل السوسة و احط مكانها حشوة

الكل يسأل شنو المشكلة و أنا أحب طب الأسنان؟؟، خلال فترة عملي بالصيف الاغلبية ما يحبون طبيب الأسنان و يتألمون قبل ما يحط اي أداة تلمس اي سن، فما بالك لما كان يقزهم ابرة؟؟ كان ويههم ينعفس (وجههم يتغير لغير متكلمي الكويتيه) و يغمضون عيونهم حيل بما اني ما احب شي اسمه ابرة كنت احاتيها

قبل كل شي سألت الدكتورة ممكن تشيلين السوسة بدون بنج ؟؟ قالت أكيد بس اذا كنت تبين تتحملين العوار أنا ما عندي مشكلة!!

بعد تفكير قررت اخذ الابرة!!!!!!!!!!!!!!!!!!!!!

المفاجأه اني ما حسيت في شي و سويت السن من غير أي ألم

كلمة أخيرة: على كل واحد منا مواجهه مخاوفه حتى لو كان شي صغير مثل الأبرة او زيارة طبيب الأسنان، فيمكن تتغير فكرته كاملة و يتغلب على هذا الخوف. الحمدالله تغلبت على خوفي

و في صور الابرة = خوفي سابقا